Аялдар лигасы муктаж айымдарга жардам көрсөттү (видео)

“Борбордук Азиядагы аялдар лигасы” кайрымдуулук фонду Жогорку Кеңештин вице-спикери Аида Касымалиева менен биргеликте Бишкек жана Ош шаарларында 1000 адамга азык-түлүк жардамын көрсөттү.

Уюштуруучулар билдиргендей, аялдар лигасына социалдык тармактагы баракчалар аркылуу жардамга өтө муктаждар, жалгыз бой энелер, убактылуу жумушсуз отургандар, мүмкүнчүлүгү чектелген жарандар, жаңы конуштарда жашаган аз камсыз болгон үй-бүлөлөр, катуу ооруп калгандардан көптөгөн арыздар келип түшкөн.

"Ар бир адамдын өз көйгөйү жана тарыхы бар. Бүгүнкү күнгө чейин жардам сурагандардын аягы токтой элек", - деди Касымалиева.

Аялдар лигасынын төрайымы Асель Атабекованын айтуусунда, азыркы оор мезгилде күнүмдүк жашоого эң керектүү азык-түлүктөр бар 1000 коробка таратылды. Алар жеке адамдарга жана жардамга муктаж болгон жарандарга жардам берген уюмдар аркылуу да жеткирилип берилди.

Лига жакында кайрымдуулук иштерин аркалоо үчүн вице-спикер Аида Касымалиева, жеке ишкер Асель Атабекова жана Гүлназ Исаева тарабынан түптөлгөн.