Ысык-Көлдө унаасы менен карга тыгылып калган казакстандык үй-бүлө куткарылды

Ысык-Көлдүн жайлоосунда кар күрткүдөн чыга албай калган казакстандык үй-бүлө куткарылды. Бул тууралуу ӨКМ кабарлады.

Маалыматка ылайык, 9-декабрда беш кишиден турган үй-бүлө Nissan Patrol унаасы менен Ак-Суу районундагы Кызыл-Кыя-Башарын жайлоосунда баратып кар күрткүсүнө тыгылып калган. Алар "Каракол" лыжа базасына эс алуу үчүн келишкен.

Жерине ыкчам түрдө алты куткаруучу тартылып, кар күрткүдө калган үй-бүлөнү унаасы менен сүйрөп чыгарып беришкен.

Учурда туристтердин абалы канааттандырарлык. Аба ырайы турукташканча Каракол шаарында калышкан.