Ноокатта алтын буюмдарды уурдоого шектелип 53 жаштагы киши кармалды (фото)

Ноокат районунда алтын буюмдарды уурдаганга шектүү катары Кара-Суу районунун Шарк айыл аймагынын тургуну, мурда соттолгон 53 жаштагы М.А. кармалды. Бул тууралуу Ош облустук ички иштер башкармалыгынын басма сөз кызматы билдирди.

Маалыматка ылайык, 17-июлда Ноокат РИИБге Ош шаарынын тургуну 29 жаштагы А кызы С. ошол эле күнү Ноокат шаарында жайгашкан алтын буюмдарды алып-сатуучу дүкөнүнө белгисиз адамдар мыйзамсыз түрдө киришип, 150 миң сом акчасын жана алтын буюмдарын уурдап кетишкендиги тууралуу арыз менен кайрылган.

Ага ылайык, Жазык кодексинин 200-беренесинин 2-бөлүгүнүн 3-пунктунда каралган кылмыштын белгилери боюнча сотко чейинки өндүрүш иши башталган жана тиешелүү ыкчам-иликтөө иштеринин жыйынтыгы менен шектүү катары Кара-Суу районунун Шарк айыл аймагынын тургуну, мурда соттолгон 53 жаштагы М.А. кармалган.

31-июлда анын үйүн тинтүү учурунда короосундагы жыйналып турган кыштардын арасынан 8 даана КРдин жарандык паспорттору, 2 даана айдоочулук күбөлүк, 7 даана банктык карта, ал эми турак үйүнүн жертөлөөсүнүн ичинде жерге көмүлгөн банкадан болжол менен 1 млн 500 миӊ сомдук алтын буюмдар табылып алынган.

Азыркы учурда далил буюм катары алынган алтындардын так өлчөмү жана баасы такталууда. Сотко чейинки өндүрүш уланууда.