Сириянын Улуттук музейинен баалуу байыркы айкелдер уурдалды

Сириянын Улуттук музейинен баалуу байыркы айкелдер уурдалды. Бул тууралуу Казинформ агенттиги жазды.

Маалыматка ылайык, жоголгон экспонаттардын катарында байыркы Рим мраморунан жасалган алты айкел бар.

Уурулук фактысы 10-ноябрда музей кызматкерлери эшиктердин бирин күч менен ачылган абалда тапкандан кийин аныкталган.

1919-жылы негизделген Улуттук музей — Сириянын эң байыркы жана маанилүү археологиялык коллекцияларын сактаган мекеме. Анын фондунда Угарит шаарынан табылган биздин заманга чейинки 14-кылымга таандык алфавит жазуулары, Пальмира шаарынан алынган грек-рим скульптуралары, ошондой эле биздин заманга чейинки 3-кылымда курулган Дура-Европос шаарындагы синагогага байланыштуу экспонаттар бар.

Сирияда жарандык согуш башталгандан кийин, 2012-жылы музей жабылууга мажбур болгон. Коллекциянын чоң бөлүгү жашыруун жайларга көчүрүлгөн. Музей 2018-жылы жарым-жартылай кайра ачылып, 2025-жылдын январынан тарта толук кандуу ишин жанданткан.

Учурда айкелдерди издөө иштери жана иликтөө жүргүзүлүүдө.