Түркия жээктеринде 80ден ашуун мигрант куткарылды

Түркиянын түндүк-батышындагы Чанаккале облусунун Айважык районунун жээгиндеги Эгей деңизинде жалпы 84 мигрант куткарылды.

Маалыматка ылайык, афганстандык мигранттар түшкөн үйлөмө кайыктар Греция тараптан суу аркылуу Түркияны көздөй жөнөтүлгөн.

1-июль күнү жергиликтүү убакыт боюнча саат 04:50дө Түркиянын Жээк коопсуздук кызматы Айважык аймагынын жээгинде бортунда көптөгөн качкындар менен үйлөмө кайык тууралуу сигнал алган.

Тиешелүү маалымат алынган соң Түркиянын Жээк коопсуздук күчтөрүнө таандык TCSG-6 катери окуя болгон жерге жөнөтүлгөн.

Операциянын натыйжасында 37 адам аман калган.

Экинчи сигнал ошол эле күнү жергиликтүү убакыт боюнча 12.24тө келген. Белгиленген аймакка КБ-20 жана КБ-4304 кайыктары менен куткаруучулар чыгып, алар 47 мигрантты куткарып калууга жетишкен.

Тиешелүү процедуралардан өткөндөн кийин мыйзамсыз жүргөн 84 мигранттын баары жергиликтүү миграция бөлүмүнө жеткирилген.