Азизбек Турсунбаев кыргызстандыктарды Мамлекеттик тил күнү менен куттуктады

Жогорку Кеңештин депутаты Азизбек Турсунбаев жалпы кыргызстандыктарды Мамлекеттик тил күнү менен куттуктады.

Төмөндө эл өкүлүнүн куттуктоо сөзү:

“Урматтуу мекендештер!

Кадырлуу замандаштар!

Сиздерди Кыргыз Республикасынын Мамлекеттик тил күнү менен чын жүрөктөн куттуктайм!

Ата-бабаларыбыздын акыл-насаатын, рухий мурасын сактап келген кыргыз тилибизге мамлекеттик тил макамы берилгенине быйыл 36 жыл толуп отурат. Бул — ар бир кыргызстандык үчүн сыймыктуу жана маанилүү дата. Тил — улуттун жаны, жүрөгү, руханий байлыгы. Ошондуктан бул күн — тарыхый мааниге ээ.

Сүйүнүчтүүсү, акыркы жылдары расмий иш-кагаздар, мекеме-уюмдардын ишмердүүлүгү мамлекеттик тилде жүргүзүлүп, мамлекеттик тилдин орду бекемделип келет. Бул — кыргыз тилин даңазалап, муундан муунга өткөрүп берүү аракеттеринин жемиши.

Көздүн карегиндей сактап келген улуу “Манас” эпосу, сөздүн көркүн ачкан төкмө акындардын мурасы – бул мамлекеттик тилибиздин көрөңгөсү. Кыргыз тилин өнүктүрүүгө, жайылтууга жана урматтоого ар бир жарандын кошкон салымы маанилүү.

Тилибиз өнүгүп-өсө берсин, эл-жерибизде тынчтык, биримдик өкүм сүрсүн! Ар бириңиздерге бакубат турмуш, ийгилик жана бекем ден соолук тилейм!

Майрамыңыздар кут болсун!”.