Насвайсыз жашоо... Бүгүн баштасаң, эртең жеңил болот

Бул текстти окуп жатканың бекеринен эмес. Демек, сен бир нерсени өзгөрткүң келүүдө. Жашоону жеңилирээк, ден соолукту таза, өзүн эркин сезгиң келет. Ооба, насвай – жөн эле адат эмес. Бул көз карандылык. “Бир күнү таштайм” деп ойлоп жүрөсүң, бирок ар күнү кайра эле аласың. ⠀

Бирок чыгуунун жолу бар. Бул жерде эч ким сени сындабайт. Биз болгону пайдалуу жолдорду айтып беребиз.

1. Качан колдонгусу келет – ошол учурду байка. Эртең мененби? Тамактан кийинби? Же болбосо стресс болгондо элеби?

Сенин “көңүлүң түшкөн учурларың” – бул өзгөрүүгө эң туура учурлар.

2. Колго жана оозго башка жумуш бер.

Насвай – бул ритуал. Анын ордуна сагыз, жаңгак, суу ичүү же терең дем алуу жардам берет. Мээге «мен башка жол тандадым» деп белгини жөнөт.

3. Организмиңе жардам бер.

Насвайды таштаганда чарчоо, кыжырдануу болушу мүмкүн. Бул нормалдуу. Жардам берет: магний, B витамини, сейилдөө, спорт жана жылуу душ. Денең кайра калыбына келет, ишен.

4. Ичиңдеги чечимди айт.

“Мен таштагым келип жатат” – ушуну бир адамга айт. Үн менен чыккан ой күчтүү болот. Атаңа, досуңа, апаңа – кимге айтсаң да жеңилдеп каласың.

5. Кайра колдонуп алсаң – “бүттү” дегендик эмес. Жеңилүү эмес. Бул сенин жолуңдагы сыноо гана. Эң маанилүүсү, кайра улантуу. Өзүңдү жемелебе.

Сен жалгыз эмессиң. Сенин жашооң насвайсыз да бактылуу боло алат. Баштоо үчүн болгону бүгүн чечим чыгарсаң жетиштүү. 

Эрмек Исмаилов

Булак: "Азия Ньюс" гезити