Акча чогултууну айткан №54 мектептин мугалими иштен алынып, директоруна сөгүш жарыяланды

Бишкек шаарындагы №54 мектептин директоруна сөгүш жарыяланды. Бул тууралуу мэриянын басма сөз кызматынан билдиришти. 

Маалыматка караганда, №54 мектептин фондуна акча чогултуу фактысы боюнча ата-энелер массалык маалымат каражаттарына кайрылган.

"Мэриянын билим берүү башкармалыгынын адистери териштирүүнү баштаган. "Директордун тамак-ашына жана башка чыгымдарга" деп каражат чогултууну айткан мугалим жумуштан алынды, мектеп директоруна сөгүш жарыяланды", - деп айтылат маалыматта. 

Мэрия №54 мектептин директорун кызматтан алуу маселеси караларын билдирди.