Кайран көңүлүм эртеңки күн болбогондо, бүгүн экөөбүз көп нерсе бүтүрөр элек

Кайран көңүлүм эртеңки күн болбогондо, бүгүн экөөбүз көп нерсе бүтүрөр элек.

⠀

Чындык булбулдун тилине катылган. Андыктан дайыма каргалар каралап турушат.

⠀

Эч убакта макталбай калдым дебе. Эгер азыгың мыкты болсо кыямат күнү бүт пенделердин алдында макталасың.

⠀

Жакпагандарга эч качан жакпайсың.

Олуя болуп суунун үстүндө бассаң дагы, бечара сүзгөндү билбейт тура дешет.

⠀

Жан дүйнөсү түндөй караңгы, пейили ийненин тешигинен тар адамдар бар. Кудайдын сабырдуулугу менен мээримдүүлүгүн караңыз.

⠀

Каалга ачылганда бирөө кирерин күткөндөй эле, кыйынчылык келсе артынан сүйүнүч келерин күтө бер.

⠀

Чыныгы адамдыктан өзүбүз ылдый түшүп алып, өйдөкүлөргө суктанып жашайбыз.

⠀

Жараткан өлөсүң десе жылмайып, дарыгер өлөсүң десе ыйлаган кайдыгер пендем ай...

⠀

Адамдарга бакыт тартуулагандарга тоскоол болгондор, өзүнүн гана жыргалы үчүн жырткычтыкка даяр айбандардан айырмасы жок!

⠀

Мүрзөдөгү адамдын абалын билгиңиз келсе, анда арамга сокур, ушакка балык, тамакка кылдат, кийимге таза жана түндүн бир оокумунда көз жаш деңизинде дубалардын кемеси менен сүзүңүз.

⠀

Жээктеги кум үстүндөгүдөй эмес, деңизге чөгүп бараткандагы абалыңдай суран. Жараткан жылдыздарды колуңа жаадырсын.

⠀

Ашыктыгың чын болсо билдирип койгонуң дурус. Балким ал кубаныч анын көптөгөн ийгиликтеринин башаты болушу мүмкүн.

⠀

Китепте  жазылгандай сүйүү болбойт. Жашоодогу сүйүүлөр китепке жазылат.

⠀

Жеңишбек Жумакадыр, акын