Зыяндын ордун толтурат. Кырсыкка кабылган автобустун айдоочусу жумуштан алынды

Жол кырсыгына кабылган №48 автобустун айдоочусу иштен алынды. Бул тууралуу “Бишкек жүргүнчүлөр автотранспорт ишканасынан” билдиришти.

Белгилей кетсек, кырсык 15-ноябрда Чыгыш автобекетинин жанында болгон. Алдын ала маалыматтарга караганда, автобустун айдоочусу чыгышты көздөй бара жатып, автобекетке жете электе рулду башкара албай, жолдон чыгып, бакты сүзгөн.

Кырсыктан 9 адам жабыркап, бардыгы амбулатордук шартта дарыланууда. Автобустун айдоочусу өзү да жаракат алган.

Ошондой эле айдоочу К.К. кырсыктын натыйжасында келтирилген зыяндын ордун толтурат - экспертизадан өткөндөн кийин унааны калыбына келтирет, анда акыркы сумма жарыяланат.

Мындан сырткары ишкананын бардык айдоочуларына жол эрежесин так сактоо боюнча түшүндүрүү иштери жүргүзүлдү.

Мэрия айдоочуларга талаптар күчөп жатканын белгиледи.